ក្រុមអ្នកស្រាវជ្រាវបានរកឃើញថា ការឱ្យកុមារមុនអាយុចូលរៀនលេង iPad និងមើលទូរទស្សន៍យូរពេក គឺប៉ះពាល់ដល់ការលូតលាស់របស់ពួកគេនៅពេលពួកគេមានអាយុ ៥ ឆ្នាំ។
ក្រុមអ្នកវិទ្យាសាស្ដ្របានវាយតម្លៃអំពីការប្រាស្រ័យទាក់ទងគ្នា សមត្ថភាពបំពេញកិច្ចការដោយប្រើដៃ ការដោះស្រាយបញ្ហា និងជំនាញផ្ទាល់ខ្លួនរបស់កុមារចំនួន ២.៤០០ នាក់នៅអាយុ២ឆ្នាំ ៣ឆ្នាំ និង ៥ឆ្នាំ។
ពួកគេបានរកឃើញថា ក្មេងដែលមើលអេក្រង់ច្រើនបំផុតនៅអាយុ២ឆ្នាំ បានបង្ហាញពីការលូតលាស់ខ្សោយនៅអាយុ៣ឆ្នាំ។
ហើយក្មេងដែលចំណាយពេលច្រើននៅមុខអេក្រង់នៅអាយុ៣ឆ្នាំមានការលូតលាស់ខ្សោយ នៅពេលមានអាយុ៥ឆ្នាំ។
ក្រុមអ្នកស្រាវជ្រាវមកពីសាកលវិទ្យាល័យ Calgary នៃប្រទេសកាណាដាបាននិយាយថា “ប្រព័ន្ធផ្សព្វផ្សាយឌីជីថលនិងអេក្រង់ឥឡូវនេះមាននៅគ្រប់ទីកន្លែងនៅក្នុងជីវិតកុមារ។
ទោះបីជាអត្ថប្រយោជន៍មួយចំនួននៃពេលវេលានៅមុខអេក្រង់ដែលមានគុណភាពខ្ពស់និងមានអន្តរកម្មត្រូវបានរកឃើញក៏ដោយ ក៏ប៉ុន្តែពេលវេលានៅមុខអេក្រង់ច្រើនហួសប្រមាណត្រូវបានផ្សាភ្ជាប់ជាមួយនឹងលទ្ធផលចុះខ្សោយផ្នែករាងកាយ ឥរិយាបថ និងខួរក្បាល”។
ការសិក្សានេះត្រូវបានបោះពុម្ភផ្សាយនៅក្នុងទស្សនាវដ្តីវេជ្ជសាស្រ្ត JAMA Pediatrics៕
សម្រួលអត្ថបទ៖ កូនផ្កាម្លិះ
