Japanese Spider Crab គឺជាពូជក្ដាមធំបំផុតលើលោក ព្រោះវាអាចលូតដង្កៀបទាំងសងខាងដល់ប្រវែង ៤ម៉ែត្រ និងទម្ងន់ជិត ២០គីឡូក្រាមឯណោះ។
ក្ដាម Japanese Spider Crab ភាគច្រើនរស់នៅមហាសមុទ្រប៉ាស៊ីហ្វិក ជិតប្រទេសជប៉ុន ក្នុងជម្រៅចាប់ពី ១៥០ម៉ែត្រ ឬលើសពីនេះ។ ក្ដាមនេះ មានអាយុវែងណាស់ ពោលគឺអាចរស់នៅដល់ ១០០ឆ្នាំ ប្រសិនបើគ្មានការយាយីណាមួយ។ Japanese Spider Crab ជាប្រភេទក្ដាមកម្រនេសាទបានណាស់ ព្រោះវារស់នៅក្នុងទឹកជ្រៅ ហើយចូលចិត្តពួនសំងំលាក់ខ្លួនក្នុងរន្ធថ្មនានា ដែលពិបាកក្នុងការតាមចាប់។
តាមការស្រាវជ្រាវរបស់អ្នកជំនាញបានឲ្យដឹងថា ក្ដាមនេះអាចបញ្ឈប់ការលូតលាស់ទំហំដងខ្លួនត្រឹម ១៥អ៊ីញ(ប្រមាណ ៤តឹក) ប៉ុន្តែដង្កៀបរបស់វា បន្តលូតលាស់ទៀតរហូតដល់ប្រវែង ១២ហ្វីត(ប្រមាណ ៤ម៉ែត្រ) ពីដង្កៀបម្ខាងទៅដង្កៀបម្ខាង។ ចំណែកទម្ងន់ខ្លួនវិញ អាចកើនរហូតដល់ ៤៤ផោន(ប្រហែល ២០គីឡូក្រាម)។
