សត្វលា ៨ក្បាលត្រូវបានឃុំខ្លួនក្នុងពន្ធធនាគារអស់រយៈ ពេល ៤ថ្ងៃបន្ទាប់ពីបានបំផ្លាញដំណាំមួយចំនួន ដែលមានតម្លៃថ្លៃនៅខាងក្រៅពន្ធធនាគារក្នុងរដ្ឋ Uttar Pradesh ប្រទេសឥណ្ឌា។
ប្រធានពន្ធធនាគារ លោក RK Mishra បាននិយាយថា “សត្វលាទាំងនេះបានបំផ្លាញដំណាំដែលមន្ត្រីជាន់ខ្ពស់រៀបចំដាំក្នុងពន្ធធនាគារ និងមានតម្លៃជិត ១ពាន់ដុល្លារ ហើយដោយសារតែម្ចាស់មិនធ្វើតាមការព្រមាននិងលែងសត្វចោលពាសវាលពាសកាល ដូចនេះយើងក៏បានឃុំខ្លួនវាទុក។”
លោក Kamlesh ដែលជាម្ចាស់សត្វបានសុំឲ្យមានការដោះលែងវិញ ប៉ុន្តែត្រូវបានបដិសេធ។ ក្រោយមកប្រាក់បង់ធានាទាំងអស់របស់ម្ចាស់លា ត្រូវបានចេញមុខបង់ដោយអ្នកនយោបាយក្នុងស្រុកម្នាក់មកពីគណបក្ស Bharatiya Janata Party (BJP)។ បើយោងតាមកាសែត NDTV ។
ជនល្មើសជើងបួនទាំង៨ក្បាល ត្រូវបានដោះលែងឲ្យមានសេរីភាពវិញកាលពីថ្ងៃចន្ទ ហើយលោក Kamlesh បានសរសេរលិខិតសន្យាមួយថានឹងមិនលែងសត្វរបស់លោកឲ្យដើរចូលតំបន់លំនៅឋាននិងតំបន់សាធារណៈទៀតនោះទេ។
