ក្រូចថ្លុងត្រូវបានគេដឹងតាំងពីទសវត្សរ៍ឆ្នាំ១៩៣០មកថា ផ្តល់អត្ថប្រយោជន៍ក្នុងការសម្រកទម្ងន់ ។ ប៉ុន្តែការសិក្សាថ្មីមួយធ្វើឡើងដោយក្រុមអ្នកស្រាវជ្រាវមកពីសាកលវិទ្យាល័យ California-Berkeleyបានអះអាងថា វា(ក្រូចថ្លុង)ក៏អាចប្រឆាំងនឹងជំងឺទឹកនោមផ្អែមបានផងដែរ តាមរយៈការជួយបន្ថយកម្រិតជាតិស្ករក្នុងឈាម និងកែលម្អតុល្យភាពអ័រម៉ូនអាំងស៊ុយលីន ។
ការសិក្សាដែលបានពិសោធលើសត្វកណ្តុរបានរកឃើញថា កណ្តុរដែលគេឱ្យស៊ីចំណីមានខ្លាញ់ច្រើននិងផឹកទឹកក្រូចថ្លុងផងនោះគឺឡើងទម្ងន់១៨ភាគរយតិចជាងកណ្តុរដែលស៊ីអាហារផ្ទុកជាតិខ្លាញ់ខ្ពស់ ប៉ុន្តែផឹកទឹកធម្មតា ។ ដូចគ្នានេះដែរ កម្រិតជាត់ស្ករក្នុងឈាមបានថយចុះពី១៣-១៧ភាគរយខណៈកម្រិតអ័រម៉ូនអាំងស៊ុយលីនបានថយចុះគុណនឹង៣ដង ។
លោក Joseph Napoli និង លោក Andreas Stahl អ្នកដឹកនាំការសិក្សាបានកត់សម្គាល់ថា ការសិក្សារបស់យើងលើកនេះគឺបានពិនិត្យមើលពីប្រសិទ្ធភាពទឹកក្រូចថ្លុងទៅលើការរំលាយអាហារ ។ ប៉ុន្តែការរកឃើញនេះដែលត្រូវបានចេញផ្សាយនៅក្នុងព្រឹត្តិបត្រវិទ្យាសាស្ត្រPLoS ONE បង្ហាញថា ទឹករបស់វាអាចជួយគ្រប់គ្រងជាតិស្ករក្នុងឈាមបានយ៉ាងមានប្រសិទ្ធភាព ដូចជាថ្នាំទឹកនោមផ្អែមមួយចំនួនផងដែរ ។
អត្ថប្រយោជន៍បែបនេះក៏ព្រោះ ទឹកក្រូចថ្លុងផ្ទុកទៅដោយសមាសធាតុ Saccharinដែលធ្វើឱ្យវាមានរសជាតិផ្អែមលាយល្វីងបន្តិច និងមួយទៀតគឺសមាសធាតុ Naringin ។
លោក Joseph Napoli បាននិយាយថា៖ «លទ្ធផលលើកនេះគឺមានន័យថា ភេសជ្ជៈទឹកផ្លែឈើស្រស់ពីធម្មជាតិជួយបញ្ចុះកម្រិតជាតិស្ករយ៉ាងមានប្រសិទ្ធភាពដូចជាថ្នាំពេទ្យដែលគេចេញវេជ្ជបញ្ជាឱ្យប្រើផងដែរ»៕
