ការជ្រើសរើសចំណីអាហារយកមកបរិភោគ គឺជាកត្តាសំខាន់ ព្រោះអាហារមួយចំនួនអាចបង្កឲ្យកើតមានជាតិខ្លាញ់ក្នុងសរសៃឈាមបេះដូង បង្កទៅជាធាត់ដុះពោះកំប៉ោង ទៅជាជំងឺលើសឈាម ទឹកនោមផ្អែម និងខ្លាញ់ក្នុងបេះដូងជាហេតុប្រឈមនឹងឱកាសគ្រោះថ្នាក់ខ្លាំង ។
ជួបជាមួយលោកវេជ្ជបណ្ឌិត ឈឺ ប្រកប ឯកទេសផ្នែកជំងឺបេះដូង និងជាអនុប្រធានផ្នែកជំងឺទូទៅនៃមន្ទីរពេទ្យព្រះកុសុមៈបានប្រាប់កោះសន្តិភាពឲ្យដឹងថា ការហូបអាហារជារឿងសំខាន់ណាស់ ដែលលោកអ្នកគួរតែយកចិត្តទុកដាក់ ។ បច្ចុប្បន្នយើងឃើញថា ប្រទេសកម្ពុជាបាននាំចូលអាហារជាច្រើនប្រភេទមកពីក្រៅប្រទេស ដើម្បីផ្គត់ផ្គង់ទីផ្សារក្នុងស្រុកជាក់ស្តែងដូចជាអាហារដែលមានសារជាតិខ្លាញ់ច្រើន ជាពិសេសគឺភ្លៅមាន់បំពង និងអាហារសម្រន់ផ្សេងទៀត ដែលភាគច្រើនគឺយុវវ័យ និងកុមារតូចៗចូលចិត្តទទួលទាន ។ ប៉ុន្តែបើសិនជាលោកអ្នកចូលចិត្តពិសាអាហារ បំពង ចៀនឆាបែបនេះ គឺជាកត្តាបង្កឲ្យកើតមានជំងឺធាត់ និងឈានទៅរកការកើតជំងឺខ្លាញ់ក្នុងបេះដូង ជំងឺលើសឈាម ទឹកនោមផ្អែម និងជំងឺផ្សេងៗជាច្រើនទៀត ។
ដូច្នេះដើម្បីចៀសផុតពីការកើតមានជំងឺទាំងនេះលោកអ្នកគួរតែកាត់បន្ថយការទទួលទានអាហារដែលមានជាតិខ្លាញ់ច្រើន ងាកមកទទួលទានអាហារដែលមានសរសៃច្រើន ដូចជា ក្រអៅឈូក ព្រលឹត ស្ពៃ បន្លែបៃតង សណ្តែកសៀង ផ្លែឈើ និងសាច់ត្រីជាដើមឲ្យបានច្រើនទើបជាការប្រសើរ។
មួយវិញទៀតលោកអ្នកគប្បីឆ្លៀតពេលធ្វើលំហាត់ប្រាណ ដើម្បីឲ្យសុខភាពរឹងមាំនិងចៀសផុតជំងឺលើសទម្ងន់ ៕
